23.7.25

Mae ardal ymarfer corff newydd wedi agor i'r cyhoedd ym Mharc Fictoria yng Nghaerdydd.

Ynghyd â bariau tynnu i fyny, lifftiau coesau, meinciau dip, troi teiars a blociau neidio, bydd yr ardal ffitrwydd newydd yn caniatáu i ymwelwyr â'r parc fynd â'u trefn ymarfer corff i'r lefel nesaf.

Mae'r offer cynnal a chadw isel wedi'i gynllunio i annog pobl o bob oedran a gallu i roi cynnig ar calistheneg. Mae'n gallu cael ei ddefnyddio am ddim gan unigolion a dosbarthiadau grŵp o hyd at 20-30 o bobl ar y tro.

Ymwelwyr â'r parc yn rhoi cynnig ar yr offer newydd.

Dywedodd y Cynghorydd Jennifer Burke, yr Aelod Cabinet dros Ddiwylliant, Parciau a Digwyddiadau: "Mae ardaloedd ymarfer corff awyr agored fel hyn yn golygu nad oes angen archebu dosbarth neu hyd yn oed dalu am aelodaeth campfa. Bydd y gallu hwnnw i droi i fyny a gwneud ymarfer corff, yn enwedig mewn amgylchedd mor hardd, yn helpu i annog hyd yn oed mwy o bobl i fwynhau manteision iechyd corfforol a meddyliol gwneud ymarfer corff."

Dywedodd preswylydd lleol a hyfforddwr personol, Becky Adams: "Mae Calistheneg yn gamp wirioneddol gynhwysol a hygyrch. Dwi'n angerddol am hyn ac mae gweld parc fel hyn yn fy ngwneud yn hapus iawn."

Dywedodd Chris Flynn, sy'n rhedeg dosbarthiadau ffitrwydd yn y parc: "Calistheneg yw un o'r chwaraeon sy'n tyfu gyflymaf yn Ewrop, mae'n ailgyflwyno patrymau symud sylfaenol, felly rydyn ni'n heneiddio ac yn gallu ymestyn uwchlaw ein pennau, er mwyn i ni allu plygu i lawr i godi siopa heb dynnu disg. Dyna beth yw calistheneg. Mae'n rhad ac am ddim, a bydd y gampfa hon yma mewn 25 mlynedd, mae'n gadarn, a dwi'n gyffrous iawn i'w defnyddio, a gobeithio pan fydd pobl yn ein gweld ni'n ei wneud, mae'n amgylchedd mor agored, byddan nhw'n dod i gymryd rhan."

Mae cyfleusterau chwaraeon a hamdden eraill yn y parc rhestredig Gradd II, yn cynnwys cyrtiau tennis, pêl-foli traeth ac ardal chwaraeon aml-ddefnydd, yn ogystal ag ardal chwarae i blant a phad sblasio i blant.

Mae'r parc yn un o ugain o barciau a mannau gwyrdd sy'n cael eu rheoli gan Gyngor Caerdydd i gael eu cydnabod gyda gwobr flaenllaw y Faner Werdd.

Darganfyddwch fwy am Barc Fictoria, yma: https://www.outdoorcardiff.com/cy/parciau/parc-fictoria/