Bellach yn ei 25ain flwyddyn, mae'r rhaglen yn hyrwyddo blaenoriaethau lleol trwy ariannu gwelliannau amgylcheddol a chyhoeddus a gynigir gan aelodau ward lleol ar gyfer eu hardaloedd.  Nod y prosiectau hyn yw gwella cymdogaethau a gwella ansawdd bywyd trigolion, ac fe'u cynlluniwyd a'u cyflwyno mewn partneriaeth â busnesau lleol, preswylwyr a grwpiau cymunedol.

Gyda chefnogaeth gan Arian Ffyniant Gyffredin Llywodraeth y DU yn ogystal â chyllid y Cyngor, mae mwy na £2m wedi'i sicrhau ar gyfer y cynlluniau eleni. 

Mae'r fenter yn chwarae rôl allweddol wrth gyflawni gweledigaeth Cryfach, Tecach, Gwyrddach y Cyngor, gan gefnogi creu cymunedau diogel, hyderus a grymus ledled y brifddinas.

Eleni, cyflwynwyd 27 o syniadau prosiect gan gynghorwyr lleol ac aseswyd pob cynnig yn erbyn meini prawf allweddol gan gynnwys effaith adfywio, cynaliadwyedd, mynd i'r afael ag anfantais, cyfranogiad cymunedol, a chyflawnadwyedd. 

O ganlyniad, mae naw prosiect adfywio cymunedol wedi'u blaenoriaethu i'w cyflawni'n llawn yn 2025/26, gyda phedwar prosiect ychwanegol wedi'u dewis ar gyfer gwaith cwmpasu a dylunio.

Dwedodd yr Aelod Cabinet dros Dai a Chymunedau, y Cynghorydd Lee Bridgeman:  "Mae'r Rhaglen Cynlluniau Adnewyddu Cymdogaethau yn rhan hanfodol o'n hymrwymiad i adeiladu cymunedau cryfach a mwy bywiog ledled Caerdydd.  Mae'r prosiectau hyn yn adlewyrchu blaenoriaethau trigolion lleol a byddant yn cyflawni gwelliannau gwirioneddol i fannau cyhoeddus, ardaloedd chwarae, ac amgylcheddau siopa. 

"Ers i'r rhaglen ddechrau yn 2000, mae cyfanswm o 127 o brosiectau adfywio lleol wedi cael eu cyflawni'n llwyddiannus ar draws y ddinas.  Rydym yn falch o barhau i fuddsoddi mewn cymdogaethau lle mae ei angen fwyaf."

 Y naw prosiect a gymeradwywyd i'w cwblhau yw:

•           Glan-yr-afon - Gwelliannau amgylcheddol manwerthu Heol y Gadeirlan Isaf

Gwella amgylchedd ac ymarferoldeb yr ardal o amgylch y siopau ar gyffordd Stryd Neville a Gerddi Despenser.

•           Llanrhymni - Gwelliannau i siopau Rhodfa Countisbury

Gwella'r amgylchedd presennol y parêd hwn, sydd â lefelau meddiant uchel ac sy'n cael ei defnyddio'n dda, gan gynnig amrywiaeth o siopau a gwasanaethau hanfodol i gymuned Llanrhymni, Tredelerch a Throwbridge gerllaw

•           Grangetown - Gwelliannau i bennau strydoedd

Gwelliannau ardal gyhoeddus i'r ardaloedd o amgylch Merches Place a phennau'r ffyrdd cyfagos.

•           Caerau - Uwchraddio Ardal Chwarae

Maes chwarae / man agored newydd i breswylwyr. Mae'r maes chwarae presennol yn Heol yr Eglwys wedi cael ei fandaleiddio dro ar ôl tro ac nid yw'n weithredol ar hyn o bryd.

•           Ystum Taf - Adleoli’r AChA ym Mharc Hailey

Symud yr Ardal Chwaraeon Aml-Ddefnydd bresennol i leoliad amgen a chreu cyfleuster modern, cynhwysol a hygyrch.

•           Y Tyllgoed - Adnewyddu maes chwarae Chorley Close

Uwchraddio'r maes chwarae yn Chorley Close, sydd wedi dadfeilio. Gallai'r gwelliannau gynnwys offer ac arwyneb newydd, i ddarparu cyfleuster chwarae o ansawdd uchel i deuluoedd lleol yn yr ardal

•           Cathays -Gwelliannau a Gwaith Celf AChA i gyffordd Gelligaer Street / Heol y Maendy

Ehangu'r palmentydd a chulhau'r ffordd wrth y gyffordd lydan, ar Heol y Maendy / Gelligaer Street. Bydd hyn yn hwyluso croesfannau mwy diogel, diogelwch cerddwyr a chyfle i ychwanegu gwyrddni.  Cyfle i ychwanegu gwaith celf at AChAau ym Mharc y Maendy a gwella diogelwch trwy osod mynedfa ychwanegol

•           Rhiwbeina - Gwelliannau i ardal gyhoeddus y pentref

Adnewyddu'r strydlun yn ardal siopa Pentref Rhiwbeina

•           Y Mynydd Bychan - Gwelliannau i Ardal Gyhoeddus Siopau Llwynbedw

Gwelliannau i'r ardal gyhoeddus ar Heol Caerffili i greu canolfan siopa leol fwy croesawgar a chynaliadwy.

Darganfyddwch fwy am y Cynllun Adnewyddu Cymdogaethau, gan gynnwys prosiectau'r gorffennol a'r rhai cyfredol yma: Ein Prosiectau