Mae Ysgol Gynradd Gatholig Sant Joseff yn Gabalfa wedi cael llawer o ganmoliaeth gan Estyn, yr Arolygiaeth dros Addysg a Hyfforddiant yng Nghymru.

Yn dilyn arolygiad diweddar, mae'r adroddiad yn tynnu sylw at amgylchedd meithringar yr ysgol, perthnasoedd cryf rhwng staff a disgyblion, ac ymddygiad ac agweddau rhagorol dysgwyr ar draws pob grŵp blwyddyn.

Disgrifiodd arolygwyr yr ysgol fel "amgylchedd bywiog, cynhwysol a meithringar" lle mae bron pob disgybl yn teimlo'n ddiogel ac wedi'i gefnogi. Canmolwyd ansawdd yr addysgu ac ymrwymiad yr ysgol i les disgyblion, gyda chlod arbennig i'r ffordd y mae staff yn diwallu anghenion dysgwyr o gefndiroedd amrywiol, gan gynnwys y 25.7% o ddisgyblion sy'n siarad Saesneg fel iaith ychwanegol.

Mae'r adroddiad hefyd yn tynnu sylw at arweinyddiaeth ragweithiol yr ysgol a'r rôl ystyrlon y mae disgyblion yn ei chwarae wrth lunio eu profiad dysgu eu hunain. Yn nodedig, cydnabuwyd "Sgwad Dysgu" yr ysgol am ei heffaith ar wella strategaethau asesu, gan rymuso disgyblion i gymryd perchnogaeth ar eu cynnydd.

Dywedodd Cyn-Bennaeth yr ysgol Alexandra Riordan, a ymddeolodd fis diwethaf: "Mae cymuned gyfan yr ysgol yn hynod falch ac yn hapus gyda'r adroddiad sy'n adeiladu ar lwyddiannau'r gwaith o sicrhau bod ein disgyblion yn barod i ddod yn ddinasyddion byd-eang caredig a gofalgar.

"Rydym yn Ysgol sy'n Parchu Hawliau Aur, wedi cyflawni ein 3^eddBaner Eco ac wedi ennill y wobr Masnach Deg uchaf, gan alluogi disgyblion i feddwl yn feirniadol am faterion sy'n wynebu ein cymdeithas fyd-eang a dysgu bod ganddynt bŵer rhethregol i wneud gwahaniaeth i'n byd ac i fywydau eraill. Rydym hefyd wedi ennill gwobr Ysgolion Iach Cenedlaethol, gwobr arian y Siarter Iaith a gwobr efydd Athroniaeth i Blant.

"Nid ydym yn ‘gorffwys ar ein bri' ac rydym yn ymdrechu tuag at ddod yn Ysgol Noddfa ac ennill gwobr LiveSimply CAFOD, gan barhau i symud ein hysgol ymlaen. Diolch i bob un aelod o'n staff am eu gwaith caled anhygoel i wneud ein hysgol y lle gwych ydyw. Rydym yn gwybod bod gennym "amgylchedd bywiog, meithringar a chynhwysol" ac mae'n hyfryd cael hynny wedi'i gadarnhau gan ESTYN.

"Diolch hefyd i'n holl rieni a gofalwyr am eu cymorth parhaus. Mae ein disgyblion gweithgar a gofalgar yn glod iddyn nhw a'u hathrawon. Yn dilyn fy ymddeoliad ar ôl wyth mlynedd fel pennaeth yn yr ysgol, roedd yr adroddiad hyfryd hwn yn anrheg ychwanegol wrth adael!"

Nododd Estyn rai meysydd ar gyfer datblygu, gan gynnwys yr angen iwella cyfleoedd i ddisgyblion hŷn ddatblygu eu sgiliau dysgu annibynnol, gwella profiadau dysgu annibynnol i ddisgyblion iau i gefnogi eu hanghenion datblygiadol a'u galluogi i ddefnyddio eu sgiliau ar lefel briodol, a gwella cyfleoedd i ddisgyblion gymhwyso eu sgiliau rhifedd yn eu gwaith ar draws y cwricwlwm.

Bydd yr ysgol yn mynd i'r afael â'r argymhellion hyn yn ei chynllun gweithredu.

Dywedodd y Cynghorydd Sarah Merry, Dirprwy Arweinydd Cyngor Caerdydd a'r Aelod Cabinet dros Addysg: "Dylai Ysgol Gynradd Gatholig Sant Joseff deimlo'n falch bod staff wedi creu cymuned lle mae pob plentyn yn cael ei werthfawrogi a'i gefnogi. Mae'r adborth gan Estyn yn cadarnhau gwaith caled ac ymroddiad pawb yn yr ysgol sydd wedi ymrwymo i adeiladu ar y llwyddiant hwn a gwelliant parhaus a dysgu sy'n canolbwyntio ar ddisgyblion."

Ar adeg yr arolygiad, roedd gan Ysgol Gynradd Gatholig Sant Joseff 229 o ddisgyblion ar y gofrestr. Mae 23.5% o'r disgyblion yn gymwys i gael prydau ysgol am ddim, mae 25.7% o'r disgyblion yn siarad Saesneg fel iaith ychwanegol ac mae 2% o'r disgyblion yn nodi bod ganddynt anghenion dysgu ychwanegol.