Trwy'r Cynllun Grantiau Adeiladau Cymunedol, gall sefydliadau wneud cais am hyd at £10,000 i gyflawni ystod o welliannau mewnol ac allanol.  Gallai’r rhain gynnwys:

• Gwella hygyrchedd 
• Uwchraddio diogelwch
• Adnewyddu ceginau
• Gosod mesurau effeithlonrwydd ynni 

Y nod yw helpu cyfleusterau lleol i ddod yn fwy croesawgar a chynaliadwy ac i gael eu defnyddio'n well gan y cymunedau maen nhw'n eu gwasanaethu.

Wedi'i ariannu gan Gronfa Ffyniant Gyffredin Llywodraeth y DU, mae'r cynllun yn ei gwneud yn ofynnol i ymgeiswyr gyfrannu o leiaf 15% o gyfanswm cost y prosiect o ffynonellau eraill.

Mae adeiladau cymwys yn cynnwys neuaddau cymunedol, canolfannau, a chyfleusterau eraill sy'n agored ac yn hygyrch i'r cyhoedd ehangach—nid dim ond i grwpiau neu aelodau penodol. Bydd ceisiadau sydd wedi'u derbyn ar gyfer adeiladau sydd o fewn ardaloedd o amddifadedd neu sy'n gwasanaethu nifer sylweddol o bobl o'r ardaloedd difreintiedig hyn yn cael eu sgorio fel blaenoriaeth uwch o'i gymharu â cheisiadau eraill.

Dywedodd yr Aelod Cabinet dros Dai a Chymunedau, y Cynghorydd Lee Bridgeman:  "Rydym yn annog sefydliadau cymunedol i gyflwyno syniadau a fydd yn gwneud eu hadeiladau'n fwy hygyrch, yn fwy ynni-effeithlon, ac yn fwy defnyddiol i'r bobl sy'n dibynnu arnynt. P'un a yw'n gegin newydd, goleuadau gwell neu fynediad gwell, mae'r cyllid hwn yma i helpu."

Gellir defnyddio grantiau ar gyfer gwelliannau strwythurol, uwchraddio diogelwch tân, ffenestri a drysau newydd, cyfleusterau toiled, systemau trydanol a draenio, a mwy.  Ond ni ellir defnyddio’r cyllid ar gyfer gwaith cynnal a chadw arferol, costau staff / costau rhedeg, na phrosiectau sydd eisoes ar y gweill neu wedi'u cwblhau.

I wneud cais ewch i:

https://www.devandregencardiff.co.uk/cy/prosiectpresennol/grant-adeiladau-cymunedol-caerdydd/
Ar gyfer ymholiadau, e-bostiwch Adfywiocymdogaethau@caerdydd.gov.uk

Dyddiad Cau am Geisiadau: 30 Mehefin 2025.