Mae Ysgol Gynradd Groes-wen wedi derbyn Gwobr Ysgol Gynhwysol Marc Ansawdd Cynhwysiant, fframwaith a gydnabyddir yn genedlaethol sy'n gwerthuso ysgolion yn seiliedig ar eu gallu i ddarparu addysg gynhwysol.

Mae'r anrhydedd yn tynnu sylw at ymroddiad cadarn yr ysgol i greu amgylchedd cynhwysol, cefnogol a grymusol i bob disgybl ac yn dangos bod yr ysgol yn cyflawni egwyddorion y Marc Ansawdd;

• Hyrwyddo mynediad ac amrywiaeth
• Codi cyflawniad i bawb
• Creu amgylchedd i bawb lwyddo
• Gwella natur gynhwysol pob ysgol

Yn ei adroddiad, canfu'r Marc Safon fod yr ysgol yn gymuned ysgol gynnes, ysbrydoledig a chroesawgar sy'n dathlu Cymreictod, wrth ymrwymo i feithrin amgylchedd cynhwysol a theg lle mae pob plentyn, aelod o staff a rhanddeiliad yn teimlo eu bod yn cael eu gwerthfawrogi, eu parchu a'u cefnogi. Mae'r dull hwn yn sail i ddull iaith ddeuol a mamiaith Cymraeg cyfunol arloesol ac unigryw yr ysgol o gyflwyno addysg Gymraeg.

Roedd y broses asesu drylwyr ar gyfer y Marc Ansawdd yn cynnwys adolygiad cynhwysfawr o bolisïau, arferion a diwylliant yr ysgol ac roedd yr ysgol yn nodedig am ei dulliau arloesol. Bob dydd, mae disgyblion yn cael 'amser Fika' dyddiol, cysyniad a ddaeth yn ôl gyda staff o ymweliad â Sweden sy'n ceisio gwella llythrennedd emosiynol plant drwy ganolbwyntio ar saith sgil ffitrwydd meddyliol allweddol a ddatblygir yn ystod sesiynau dyddiol byr.

Defnyddir dull Froebelian hefydsy'n pwysleisio datblygiad cyfannol plant drwy chwarae strwythuredig, creadigrwydd ac archwilio.Mae hyn yn sbardun allweddol i ddatblygu'r amgylchedd awyr agored a chwricwlwm y Meithrin, gyda chynlluniau i ddatblygu hyn yn y dosbarthiadau derbyn o fis Medi ymlaen.

Mae llwyddiant y dull Fika a Froebelian, ynghyd ag addysgu medrus, yn amlwg yn amgylchedd hamddenol a heddychlon yr ysgol. Mae offer ac adnoddau ystafelloedd dosbarth, gan gynnwys llawer o ddeunyddiau naturiol, yn helpu i greu awyrgylch tawel, tra bod cerddoriaeth dawel yn chwarae wrth i'r plant weithio. O ganlyniad, er bod ystafelloedd dosbarth yn brysur ac yn llawn gweithgaredd, mae ganddynt ymdeimlad o dawelwch, ffocws a balchder ymhlith y plant yn eu hysgol.

Mynegodd y Pennaeth Richard Carbis ei falchder yng nghyflawniad yr ysgol, gan ddweud: "Fel Pennaeth Ysgol Groes-wen, rwy'n hynod falch o ymdrech y staff a'r holl randdeiliaid i fod mor gynhwysol â phosibl i anghenion pob disgybl yn ein gofal sydd hefyd yn golygu cefnogaeth i'n rhieni. Er ein bod yn ysgol newydd, mae'r angerdd i gynnwys pawb ar ein taith yn bendant wedi dangos ein gweledigaeth ar waith. Rydyn ni bob amser yn 'Cryfach gyda'n Gilydd.'"

Dywedodd Cadeirydd Llywodraethwyr yr ysgol, Anna Taliana, mewn ymateb i'r newyddion: "Efallai ein bod ni'n fach ond rydyn ni'n gwneud y gorau i'n plant a bydd y sylfeini rydyn ni'n eu hadeiladu nawr yn ein rhoi ar y llwybr cywir i barhau â'r gwaith anhygoel hwn rydyn ni'n ei wneud."

Dywedodd y Cynghorydd Sarah Merry, Dirprwy Arweinydd Cyngor Caerdydd a'r Aelod Cabinet dros Addysg:  "Mae Ysgol Gynradd Groes-wen wedi arddangos beth mae'n ei olygu i fod yn wirioneddol gynhwysol ac mae'r wobr hon yn dyst i ymroddiad a gwaith caled cymuned gyfan yr ysgol.

Mae cael cydnabyddiaeth ar y lefel hon yn anrhydedd anhygoel ac yn adlewyrchu cryfder ethos cynhwysol yr ysgol - Llongyfarchiadau."

Ychwanegodd y Cynghorydd Merry:  "Ar hyn o bryd rydym yn datblygu Strategaeth Cynhwysiant Caerdydd mewn cydweithrediad â rhanddeiliaid ledled y ddinas. Mae'r gwaith ardderchog sy'n cael ei wneud yn Ysgol Gynradd Groes-wen, sy'n cyd-fynd â'r Marc Ansawdd Cynhwysiant, yn helpu i lywio a llunio'r strategaeth hon.

"Gan weithio'n agos gyda'r Marc Ansawdd, rydym wedi gweld dros ein hunain yr effaith gadarnhaol y gall ei chael ac rwy'n awyddus iawn i weld mwy o ysgolion yn cyflawni Ardystiad y Marc Ansawdd."