1.4.25

Mae Awdurdod Harbwr Caerdydd yn dathlu ei 25ain pen-blwydd heddiw (1 Ebrill 2025).

I ddathlu, mae'r cyhoedd yn cael cynnig cyfle i gael gwybod mwy am y bobl 'Y Tu ôl i'r Bae' mewn arddangosfa ffotograffiaeth arbennig a fydd yn cael ei chynnal ym Mae Caerdydd o ddydd Llun 26 Mai tan ddiwedd yr haf, cyn symud i'r Eglwys Norwyaidd.

Mae'r arddangosfa'n cynnwys lluniau trawiadol y mae'r ffotograffydd teithio a dogfennol Nick Pumphrey wedi'u tynnu o staff sy'n gweithio i Gaerdydd i reoli'r gwaith o weithredu morglawdd Bae Caerdydd, sicrhau mordwyo diogel i gychod, monitro ansawdd dŵr, cysylltu â busnesau a chymunedau lleol, a gofalu am Warchodfa Gwlyptiroedd Bae Caerdydd ac Ynys Echni.

Dan yr enfys: mae tîm yr amgylchedd wrth eu gwaith. Llun:  Nick Pumphrey

Mae gweithredu llifddorau'r Morglawdd yn broses hollbwysig. Mae'r tîm yn dehongli data llif o afonydd Elái a Thaf. Gan ddefnyddio'r data hwn, maen nhw'n gwneud penderfyniadau o ran pa gyfuniadau agor y llifddorau sydd eu hangen i gynnal lefel y Bae. Llun:  Nick Pumphrey

Dywedodd Aelod Cabinet Cyngor Caerdydd sy'n gyfrifol am Awdurdod Harbwr Caerdydd, y Cynghorydd Jennifer Burke: "Mae Bae Caerdydd yn rhan mor fawr o'r ddinas ac mae'r tîm yn Awdurdod Harbwr Caerdydd wedi bod yn gweithio i Gaerdydd 24 awr y dydd, 365 diwrnod y flwyddyn am y 25 mlynedd diwethaf i'w reoli, ei weithredu a'i gynnal.

"Mae hynny'n rhywbeth sy'n werth ei ddathlu a byddwn yn annog pobl yn ystod blwyddyn y pen-blwydd hwn i edrych 'Y Tu ôl i'r Bae' ar y staff gweithgar sy'n helpu i wneud Bae Caerdydd yr hyn ydyw heddiw."

Tim a Dave o'r tîm amgylchedd yn adfer sonde (offeryn ansawdd dŵr) safle 34. Llun:  Nick Pumphrey

Crëwyd rhaglen brentisiaeth yn 2015. Mae dau o'r prentisiaid wedi ennill rolau peirianneg llawn amser yn y Morglawdd. Llun:  Nick Pumphrey

Bydd dathliadau'r 25ain pen-blwydd yn parhau trwy gydol y flwyddyn a bydd hefyd yn cynnwys:

• cyhoeddi llyfr coffaol, sy'n ymchwilio i Awdurdod Harbwr Caerdydd yn y gorffennol a'r presennol, a fydd ar gael i'w ddarllen ar wefan Awdurdod yr Harbwr
• cystadleuaeth 'Dylunio Baner Arth' i blant oedran ysgol gynradd, gyda'r 25 cais buddugol yn cael eu harddangos yn y Bae yn ystod gwyliau'r haf
• cystadleuaeth Croeso Caerdydd gyda 25 o wobrau cyffrous sy'n gysylltiedig â'r Bae i'w hennill
• Bydd Lighthouse Theatre yn cynnal teithiau cychod a beicio Bae Caerdydd, ar thema pen-blwydd Awdurdod Harbwr Caerdydd.
• gwely blodau arddangos arbennig ar Forglawdd Bae Caerdydd, wedi'i blannu yn ôl dyluniad '25'.
• cyfryngau cymdeithasol ar thema pen-blwydd ar gyfrifon cyfryngau cymdeithasol Bae Caerdydd, sy'n cynnwys eiliadau ac atgofion arbennig y cyhoedd, proffiliau staff Awdurdod Harbwr Caerdydd, ffeithiau diddorol y Bae a mwy
• cyfres bodledu gyda chyn-staff yn cofio dyddiau cynnar AHC.

I gael mwy o wybodaeth am Awdurdod Harbwr Caerdydd a'i gynlluniau i ddathlu 25 mlynedd, ewch i: https://www.harbwrcaerdydd.com/