Ailddechreuodd casgliadau gwastraff gardd ledled y ddinas yr wythnos hon ar ôl egwyl y gaeaf, ond bydd trigolion bellach yn gallu rhoi eu gwastraff gardd allan i’w gasglu bob pythefnos am 50 wythnos o'r flwyddyn. Mae hynny'n golygu 25 casgliad gwastraff gardd y flwyddyn - i fyny o 18 y flwyddyn.

Bydd y gwasanaeth yn oedi am bythefnos dros y Nadolig i ailgyfeirio adnoddau a rheoli'r swm cynyddol o ailgylchu a achosir gan dymor y Nadolig.

Dywedodd y Cynghorydd Norma Mackie, yr Aelod Cabinet dros Wastraff, Strydlun a Gwasanaethau Amgylcheddol, ei bod yn falch iawn o allu ehangu’r gwasanaeth: "Rydym yn buddsoddi yn y gwasanaethau hyn ar ôl gwrando ar adborth gan ein trigolion. Fe wnaethon nhw ofyn ac rydyn ni'n cyflawni ar eu cyfer. Mae'r setliad cyllideb gwell a gafwyd gan Lywodraeth Cymru wedi ein galluogi i wneud hyn, ac rwy'n hapus iawn ein bod yn gallu gwneud y newidiadau hyn. Bydd hyn yn helpu trigolion gyda chlirio dail - sy'n dod yn fwy anwadal bob blwyddyn oherwydd newid hinsawdd - a bydd hefyd yn helpu'r garddwyr brwd hynny sy’n gweld eu gerddi yn para am gyfnod hirach yn yr hydref ac yna'n dechrau’n gynharach yn y gwanwyn.

"Ein gobaith yw y bydd hyn yn cefnogi garddwyr brwd ac yn gwella ailgylchu gwastraff gardd ar yr un pryd. Caerdydd yw un o'r dinasoedd gorau yn y byd am ailgylchu ac mae casgliadau gwastraff gardd yn helpu'r ddinas i gyrraedd ei thargedau ailgylchu, ond mae'n bwysig bod trigolion yn defnyddio'r gwasanaeth yn y ffordd gywir, gan ailgylchu'r deunyddiau cywir yn unig. Er mwyn sicrhau bod ein compost o ansawdd uchel, gofynnaf i bawb roi gwastraff gardd organig yn unig yn eu biniau. Symudwch unrhyw eitemau nad ydynt yn wastraff gardd cyn eu casglu a'n helpu i wthio Caerdydd hyd yn oed yn uwch i fyny'r siartiau ailgylchu."

Rydym hefyd yn atgoffa trigolion na fydd unrhyw wastraff ychwanegol sy'n cael ei adael wrth ymyl cynwysyddion yn cael ei gasglu. Dilynwch y canllawiau hyn i helpu'r Cyngor i sicrhau proses gasglu sy’n rhwydd ac effeithlon.

Mae eitemau gwastraff gardd a dderbynnir yn cynnwys:

• ✔️ Dail
• ✔️ Toriadau gwair
• ✔️ Toriadau planhigion/blodau
• ✔️ Brigau/canghennau bach
• ✔️ Deunydd gwelyau anifeiliaid nad ydynt yn bwyta cig (e.e. gwair, gwellt, naddion pren gan foch cwta a chwningod)
• ✔️ Coed Nadolig go iawn, wedi'u torri i fyny a'u rhoi yn y bin neu'r sach

Eitemau na ellir eu derbyn:

• ❌ Compost/pridd
• ❌ Rwbel/cerrig addurniadol
• ❌ Eitemau gardd (e.e. caniau dyfrio, corachod, potiau planhigion)
• ❌ Pren (wedi’i drin neu heb ei drin)
• ❌ Bagiau ailgylchu gwyrdd
• ❌ Gwastraff cyffredinol