Nodwyd y gwelliant hwn yn ddiweddargan Auto Trader, a sgoriodd Caerdydd ymhlith y 10 dinas orau yn y DU am yr ansawdd aer gorau, sy'n golygu mai hi yw'r unig ddinas yng Nghymru i dderbyn yr anrhydedd hon.

I fonitro llygredd aer, mae'r cyngor yn defnyddio gwahanol orsafoedd monitro ansawdd aer sy'n olrhain llygryddion fel Nitrogen Deuocsid (NO₂) a deunydd gronynnol (PM10 a PM2.5). Mae terfynau cyfreithiol wedi eu gosod ar gyfer NO₂ a PM₁₀, ac mae rhaid i awdurdodau lleol yng Nghymru fonitro ac adrodd ar eu canfyddiadau i Lywodraeth Cymru yn flynyddol.

Dyma rai o brif ganfyddiadau data 2023:

• Safleoedd Monitro Awtomataidd: Cyn mis Mai 2023, roedd pedwar safle (Fredrick Street, Richards Terrace, Stryd y Castell, ac Ysgol Gynradd Lakeside) yn cydymffurfio â lefelau NO2, PM10, a PM2.5. Roedd 45 safle ychwanegol a osodwyd ym mis Mai 2023 hefyd yn cydymffurfio.
• Safleoedd Monitro Anawtomataidd: Dangosodd data o 135 o safleoedd sy'n monitro NO2 eu bod yn cydymffurfio â safonau ansawdd aer, gyda gostyngiad o 37% mewn allyriadau NO2 ers 2019. Roedd crynodiadau cyfartalog NO2 yn is nag yn ystod y pandemig.
• Ardaloedd Rheoli Ansawdd Aer (ARhAAau): Mae gan Gaerdydd bedwar ARhAA (Canol y Ddinas, Stephenson Court, Pont Elái, a Llandaf). Mae'r data diweddaraf yn dangos gwelliannau ym mhob ARhAA, gyda chrynodiadau llygryddion yn is na'r terfynau cyfreithiol.

Dywedodd y Cynghorydd Dan De’Ath, yr Aelod Cabinet dros Newid Hinsawdd, Cynllunio Strategol a Thrafnidiaeth yng Nghyngor Caerdydd: "Ansawdd aer gwael yw'r risg amgylcheddol mwyaf i iechyd y cyhoedd yn y DU, ac ar ôl ysmygu, yr ail fygythiad mwyaf. Mae dod i gysylltiad â llygredd aer yn lleihau disgwyliad oes ac yn cynyddu'r risg o glefyd y galon, strôc, clefydau anadlol, canser yr ysgyfaint a chyflyrau eraill. Mae Iechyd Cyhoeddus Cymru yn amcangyfrif bod 1,100 o farwolaethau y gellir eu hosgoi bob blwyddyn yn gysylltiedig ag amlygiad i NO2.

"Er bod data 2023 yn galonogol, mae unrhyw fath o lygredd aer yn niweidiol i iechyd, ac mae'n rhaid i ni barhau i wella ansawdd aer Caerdydd. Mae'r cyngor wedi cymryd camau i leihau llygryddion, gan gynnwys cyflwyno bysus trydan, ôl-ffitio bysus, gweithredu mesurau lliniaru tacsis, a gwella llwybrau beicio a cherdded, sydd i gyd yn chwarae rhan wrth wella'r aer rydym yn ei anadlu a helpu ein canlyniadau iechyd.

"Mae'r cyngor wedi gwneud newidiadau sylweddol i lif traffig ar Stryd y Castell dros y blynyddoedd diwethaf, sydd wedi arwain at ostyngiad yn lefelau NO₂ o dros 40μg/m3 i 33μg/m3, ymhell o fewn terfynau cyfreithiol. Rwy'n falch iawn o ddatgelu bod Llywodraeth Cymru wedi cadarnhau cyllid i wneud y newidiadau hyn yn barhaol, a fydd yn gwella’r strydlun ac yn sicrhau bod y gwaith da hwn sy'n lleihau llygredd yn cael ei gynnal a'i wella.

"I grynhoi, cafodd ansawdd aer Caerdydd ei wella’n sylweddol yn 2023 o'i gymharu â lefelau cyn y pandemig ac mae'n is na'r lefelau a gafwyd yn ystod y pandemig. Er bod hyn yn galonogol, mae angen mwy o waith. Gall pawb helpu i leihau llygryddion drwy ddefnyddio trafnidiaeth gyhoeddus, beicio neu gerdded, a fydd hefyd yn helpu i leihau ein hôl troed carbon a mynd i’r afael â newid yn yr hinsawdd."