Ddydd Iau, 17 Hydref, gofynnir i Gabinet y cyngor dderbyn argymhelliad i awdurdodi benthyciad ychwanegol o £1,630,000 o dan gynllun Adfywio Canol Trefi Llywodraeth Cymru er mwyn helpu i ddelio â'r gost uwch o adnewyddu Tŷ’r Parc i fodloni gofynion treftadaeth, gan gynyddu’r benthyciad gwreiddiol a oedd yn £950,000.

Mae Tŷ’r Parc neu’r Park House, adeilad rhestredig Gradd 1 a gynlluniwyd gan y pensaer Fictoraidd enwog William Burges ar gyfer yr Arglwydd Bute, wedi bod yn wag am 18 mis. Gan ddefnyddio cynllun benthyciadau Llywodraeth Cymru, nod y cyngor yw helpu i adfer y berl bensaernïol hon i'w hen ogoniant.

Ar ôl ei gwblhau, bydd Tŷ’r Parc yn cael ei droi'n dŷ bwyta a lleoliad digwyddiadau bywiog, gan gyfuno amwynderau modern â'i harddwch pensaernïol oesol.

Mae'r prosiect yn cael ei arwain gan y cogydd uchel ei barch o Gymru, Tom Simmons, sy'n adnabyddus am ei ddull arloesol o goginio. Mae Simmons yn bwriadu creu profiad bwyta o ansawdd uchel a fydd yn denu trigolion ac ymwelwyr, gan wneud Tŷ’r Parc yn brif gyrchfan ar gyfer bwyd a digwyddiadau.

Dwedodd y Cynghorydd Russell Goodway, Aelod Cabinet dros Fuddsoddi a Datblygu: "Mae adfywio Tŷ’r Parc yn brosiect hanfodol i Gaerdydd. Mae nid yn unig yn cadw darn sylweddol o'n treftadaeth bensaernïol ond hefyd yn adfywio canol y ddinas, gan ddarparu cyfleoedd newydd i fusnesau a'r gymuned.  Rydym wedi ymrwymo i sicrhau bod Tŷ’r Parc yn parhau i fod yn dirnod y gall Caerdydd fod yn falch ohono, ac rydym yn edrych ar ddefnyddio cynllun benthyca sydd ar gael i ni gan Lywodraeth Cymru, sydd wedi'i anelu at adfywio canol trefi, fel y gellir adfer yr adeilad yn llawn."

I adennill costau'r benthyciad, bydd y busnes yn ad-dalu dros amser a bydd yr arian yn cael ei ailgylchu i gynlluniau tebyg eraill.  Mae'r dull hwn yn sicrhau bod y cymorth ariannol a ddarperir yn cael ei ddefnyddio'n effeithiol ac yn gynaliadwy. 

Mae effaith economaidd ddisgwyliedig prosiect adfywio Tŷ’r Parc yn sylweddol.  Yn ôl astudiaeth Traweffaith Economaidd Savills, mae disgwyl i Dŷ'r Parc wedi ei adnewyddu gynhyrchu 10,900 o ymwelwyr y flwyddyn, gan gyfrannu hanner miliwn o bunnoedd y flwyddyn i'r economi leol.

Bydd y prosiect hefyd yn dod â manteision sylweddol i'r gymuned leol.  Mae Tom Simmons yn bwriadu gweithio gydag ysgolion lleol drwy fenter Addewid Caerdydd. Mae Addewid Caerdydd yn rhaglen sy'n cysylltu ysgolion, busnesau a sefydliadau i helpu pobl ifanc yng Nghaerdydd i ennill sgiliau a phrofiadau gwerthfawr.  Trwy weithio mewn partneriaeth ag Addewid Caerdydd, bydd Simmons yn cynnig cyrsiau hyfforddi mewn rheoli digwyddiadau o ansawdd uchel. Mae hyn yn golygu y bydd myfyrwyr yn cael cyfle i ddysgu am gynllunio a chynnal digwyddiadau, a allai agor cyfleoedd gyrfa cyffrous iddynt yn y dyfodol. Nod y fenter hefyd yw chwalu'r rhwystrau sy'n gysylltiedig â symudedd cymdeithasol, anableddau a stereoteipiau, gan sicrhau bod pob myfyriwr yn cael cyfle cyfartal i lwyddo.  Bydd y prosiect hefyd yn creu gofod newydd, bywiog ar gyfer cynulliadau cymdeithasol, digwyddiadau a chiniawa, gan ddarparu lleoliad ar gyfer dathliadau lleol. Bydd y gwaith adnewyddu hefyd yn gwella apêl yr ardal, gan gyfrannu at wella canol y ddinas yn gyffredinol.  Yn ogystal, bydd y prosiect yn cefnogi busnesau lleol drwy ddenu mwy o ymwelwyr i'r ardal, rhoi hwb i'r economi leol a chreu cyfleoedd gwaith i breswylwyr.

Mae Park House, a gynlluniwyd gan William Burges, yn cael ei ystyried yn un o'r tai pwysicaf yng Nghymru’r 19eg ganrif. Dyluniodd Burges, pensaer Fictoraidd amlwg, adeiladau nodedig eraill yng Nghaerdydd hefyd, gan gynnwys Castell Caerdydd a Chastell Coch. Mae ei waith yn cael ei ddathlu oherwydd ei arddull Adfywiad Gothig cywrain, ac mae Tŷ’r Parc yn enghraifft wych o'i ddisgleirdeb fel pensaer. Mae arwyddocâd hanesyddol a mawredd pensaernïol yr adeilad yn gwneud ei adfer yn flaenoriaeth cyn iddo ddirywio ymhellach oherwydd iddo gau yn ddiweddar. Mae'r adeilad wedi'i leoli ger yr Amgueddfa Genedlaethol a Neuadd y Ddinas, gan ychwanegu at ei bwysigrwydd a'i amlygrwydd yn y ddinas.

Mae'r Cynllun Benthyciadau Trawsnewid Trefi wedi bod yn allweddol wrth gefnogi adfywio sawl adeilad allweddol arall yng Nghaerdydd.  Mae enghraifft nodedig yn cynnwys Parador 44, gwesty ar thema Sbaenaidd uwchben Asador, yng nghanol y ddinas.

Mae'r Cyngor yn bwriadu sicrhau'r benthyciadau ar gyfer prosiect Tŷ’r Parc drwy gyfuniad o fesurau gan gynnwys arwystl sefydlog dros yr eiddo a dyledeb ar y busnes. Mae hyn yn golygu bod gan y Cyngor hawliad cyfreithiol dros yr eiddo a'r asedau busnes, y gellir eu defnyddio i adennill swm y benthyciad os oes angen.

Bydd Cabinet Cyngor Caerdydd yn ystyried yr adroddiad yn ei gyfarfod nesaf Ddydd Iau 17 Hydref. Gallwch wylio ffrwd fyw o hwnnw yma Agenda ar gyfer y Cabinet Ddydd Iau 17 Hydref 2024, 2.00pm : Cyngor Caerdydd (moderngov.co.uk)  

Cyn hynny, bydd Pwyllgor Craffu'r Economi a Diwylliant yn adolygu'r adroddiad a'i argymhellion o 4.30pm Ddydd Mawrth 15 Hydref. Gallwch wylio'r cyfarfod pwyllgor hwnnw ar ffrwd fyw o’r cyfarfod hwnnw yma Agenda’r Pwyllgor Craffu’r Economi a Diwylliant Ddydd Mawrth 15 Hydref, 2024, 4.30pm : Cyngor Caerdydd (moderngov.co.uk) lle gallwch hefyd weld yr adroddiad llawn ar yr agenda.