12/7/24


Roedd hi'n hydref pan aeth cyfres o 'Gigs Bach' gan rai o'r perfformwyr mwyaf poblogaidd ar y sîn gerddoriaeth Gymreig ar daith o gwmpas ysgolion uwchradd Caerdydd, gan gychwyn rhaglen Cyngor Caerdydd gyda'r nod o ysbrydoli dysgwyr a sicrhau talent ddawnus ar gyfer sector cerddoriaeth Caerdydd.

Yr wythnos hon - ar ôl rhaglen fentora, hyfforddiant a chymorth gan bartneriaid y diwydiant cerddoriaeth, gan gynnwys Cerddcf, Anthem, a Sound Progression, yn ogystal â Duke al Durham, Maddie Jones, Alex Jones, Wonderbrass, Dflexx a Farrah - aeth disgyblion o ysgolion ledled Caerdydd i'r llwyfan yng Nghlwb Ifor Bach mewn cyfres o ddigwyddiadau arddangos arbennig o flaen cynulleidfa a oedd yn cynnwys DJ BBC 6 Music, Huw Stephens, a DJ BBC Radio 1, Sam MacGregor. 

Disgyblion o Ysgol Uwchradd Cantonian ar lwyfan Clwb Ifor Bach (credyd Cyngor Caerdydd)

Dywedodd y Cynghorydd Sarah Merry, Dirprwy Arweinydd y Cyngor a'r Aelod Cabinet dros Addysg: "Mae blwyddyn gyntaf ein rhaglen Gigs Bach wedi mynd â disgyblion o fan lle nad oedd rhai ohonynt erioed wedi profi gig o'r blaen, i berfformio eu cerddoriaeth eu hunain yn un o leoliadau mwyaf eiconig Caerdydd o flaen gweithwyr proffesiynol sefydledig yn y diwydiant - mae hynny'n dipyn o daith mewn cyfnod o un flwyddyn academaidd. 

"Bydd y sgiliau maen nhw wedi'u hennill a'r profiadau maen nhw wedi'u cael fel rhan o'r rhaglen Gigs Bach yn rhoi sylfaen dda iawn i bob un ohonyn nhw ar gyfer gyrfaoedd posib yn y sector cerddoriaeth yn y dyfodol, boed hynny'n perfformio ar lwyfan neu yn un o'r rolau y tu ôl i'r llenni yn y diwydiant."     

Sefydlwyd llawer o'r 21 o fandiau a berfformiodd yn ystod gweithdai a gynhaliwyd fel rhan o'r rhaglen Gigs Bach, a oedd yn cynnwys gweithdai 'Band o Sgrats' yn ogystal â sesiynau ar gynhyrchu cerddoriaeth, cyfansoddi caneuon a chyfansoddi. Roedd y rhaglen hefyd yn cynnwys cyfleoedd i gymryd rhan 'y tu ôl i'r llenni' gyda gweithdai a sesiynau a oedd yn ymdrin â rheoli llwyfan, rheoli bandiau, a hyrwyddo - gan gynnwys y cyfle i ddylunio ac argraffu crysau-t band i'w gwisgo yn y gigs arddangos, mewn sesiwn 'Dylunio eich Nwyddau eich hun' gyda Printhaus, wedi'i hwyluso gan Actifyddion Artistig.

Wrth siarad cyn perfformio, dywedodd HJ o'r band Violet Chapter - sy'n cynnwys disgyblion o Ysgol Plasmawr, Ysgol Gyfun Radur, ac Ysgol Uwchradd Gymunedol Gorllewin Caerdydd a sefydlwyd allan o'u cariad at Metallica mewn gweithdy 'Band o Sgrats': "Hwn oedd y profiad gorau posib. Roeddwn i bob amser yn meddwl y byddwn i'n ymwneud â cherddoriaeth, ond mae hyn wedi gwneud i mi fod eisiau ymwneud â cherddoriaeth hyd yn oed yn fwy. Pe bawn i'n rhoi cyngor ar sut i gael pobl ifanc i gymryd rhan mewn cerddoriaeth, dyma fyddai'r ffordd. Rhowch gyfle i blant eraill wneud hyn."

Violet Chapter yn perfformio yng Nghlwb Ifor Bach fel rhan o'r rhaglen 'Gigs Bach' (credyd Cyngor Caerdydd) 

Dywedodd Amelie, sy'n fyfyriwr blwyddyn olaf yn Ysgol Uwchradd Caerdydd y mae disgwyl iddi ddechrau cwrs Cynhyrchu Cerddoriaeth yn y coleg ym mis Medi: "Mae wedi bod yn dda iawn, yn gynhwysol iawn, yn bositif iawn - dwi'n hoffi bod mewn band a chwarae mewn band a'r holl bethau yna, ond mae bod mewn band a gwybod sut i reoli dy hun a hyrwyddo dy hun fel cerddor yn bwysig iawn hefyd, dwi'n meddwl bod yr holl beth yn ddiddorol iawn. Rydw i wedi dysgu llawer am gynllunio, edrych ar sut maen nhw'n cynllunio'r gigs, sydd wedi fy helpu'n fawr."

Un o'r ysgolion oedd â band yn perfformio ei gig cyntaf oedd Ysgol Uwchradd Cantonian.   Dywedodd yr Athro Cerdd, Helen Morris: "Mae wedi bod yn brofiad gwych iddyn nhw, ni fydd llawer ohonyn nhw erioed wedi perfformio mewn lleoliad fel hyn, ac mae'n debyg na fydden nhw'n cael y profiad oni bai am y prosiect hwn.

"Mae'n bendant wedi helpu gwneud iddyn nhw feddwl am gerddoriaeth fel gyrfa bosib. Mae'n un o'r profiadau hynny maen nhw'n mynd i edrych yn ôl arno a meddwl, roedden ni'n gerddorion go iawn a dweud y gwir. Gobeithio y bydd yn eu hannog i barhau i gydweithio fel band, archwilio profiadau eraill o ran perfformio a gigs byw, ond hefyd llwybrau eraill mewn cerddoriaeth, fel technegwyr a pheirianwyr sain." 

Dywedodd y Cynghorydd Jennifer Burke, yr Aelod Cabinet dros Ddiwylliant, Parciau a Digwyddiadau: "Mae sîn gerddoriaeth Caerdydd yn llawn talent ond os yw am barhau i ffynnu yn y dyfodol, mae angen talent barhaus arni.

"Mae'r rhaglen Gigs Bach yn rhan allweddol o'n Strategaeth Gerddoriaeth i gefnogi sîn gerddoriaeth Caerdydd a rhoi cerddoriaeth wrth wraidd twf a datblygiad y ddinas. Dyluniwyd y rhaglen i ysbrydoli, grymuso a galluogi'r genhedlaeth nesaf o weithwyr proffesiynol yn y sector cerddoriaeth - o edrych ar ddigwyddiadau arddangos yr wythnos hon yng Nghlwb Ifor Bach, mae dyfodol sîn gerddoriaeth Caerdydd mewn dwylo da."