Bydd y digwyddiad rhad ac am ddim hwn sy’n addas i deuluoedd yn cael ei gynnal ddydd Mercher, 6 Awst o 1–4pm, ac mae’n addo bod yn brynhawn llawn chwarae creadigol ac actif i blant a phobl ifanc o bob oedran. Mae thema eleni, Lleoedd i Chwarae, yn dathlu pwysigrwydd lleoedd hygyrch a chynhwysol lle gall plant chwarae'n rhydd, cysylltu â ffrindiau, a theimlo'n rhan o'u cymuned.

Wedi'i drefnu gan dîm Gwasanaethau Chwarae'r Cyngor o fewn y Gwasanaethau Plant, mewn partneriaeth ag adrannau eraill y cyngor a sefydliadau cymunedol, mae'r digwyddiad yn un o uchafbwyntiau calendr yr haf.

Bydd y gweithgareddau yn y digwyddiad yn cynnwys chwarae mwd, gwneud bathodynnau, argraffu crysau-t, swigod, gemau gardd, chwaraeon, drymio samba, sgiliau syrcas a chelf a chrefft amrywiol.

Bydd partneriaid gan gynnwys Heddlu De Cymru, Menter Caerdydd, Gwasanaethau Ieuenctid Caerdydd, Maethu Cymru Caerdydd a llawer mwy yno i gynnig gweithgareddau a rhannu gwybodaeth am eu gwasanaethau.

Dywedodd y Cynghorydd Peter Bradbury, yr Aelod Cabinet dros Drechu Tlodi a Chefnogi Pobl Ifanc: “Rydyn ni nawr yn cyfri’r dyddiau tan Ddiwrnod Chwarae Cenedlaethol – un o’r uchafbwyntiau ymhlith ein digwyddiadau dros yr haf. Ei nod yw rhoi rhyddid i blant archwilio, creu, ac i fod yn blant. Mae'n ddathliad o ddychymyg, cyfeillgarwch a hwyl – felly gwisgwch eich hetiau haul a dewch â'ch ymdeimlad o antur.

“Rydyn ni’n edrych ymlaen at groesawu teuluoedd o bob cwr o'r ddinas i gaeau chwarae Canolfan Hamdden y Dwyrain yr wythnos nesaf.”

Anogir teuluoedd i ddefnyddio teithio llesol – cerdded, beicio, neu drafnidiaeth gyhoeddus – i gyrraedd y digwyddiad er mwyn helpu i gefnogi Caerdydd lanach a gwyrddach. Mae'r lleoliad yn hawdd ei gyrraedd ar lwybrau cerdded a beicio lleol, a bydd lle i barcio beiciau ar gael ar y safle. Am opsiynau trafnidiaeth gyhoeddus, ewch i Traveline Cymru - Cynllunio Taith.

I gael mwy o wybodaeth am y Gwasanaethau Chwarae Plant, ewch i: https://gwasanaethauchwaraeplantcaerdydd.co.uk/