21/1/2025

Mae Ysgol Uwchradd Willows yn Nhremorfa wedi cael ei chanmol gan Estyn yn ystod arolygiad diweddar, gyda chanmoliaeth yn cael ei rhoi i gymuned groesawgar yr ysgol, ei hymrwymiad i amrywiaeth a'i ffocws ar greu amgylchedd dysgu cadarnhaol.

Yn ei adroddiad, cydnabu Estyn nifer o uchafbwyntiau allweddol, gan gynnwys;

• Gweledigaeth a Gwerthoedd: Mae Ysgol Uwchradd Willows yn meithrin diwylliant lle mae disgyblion yn "perthyn, yn credu, ac yn cyflawni." Gwelir y weledigaeth hon yn y berthynas gref rhwng disgyblion a staff a'r disgwyliadau uchel ar gyfer ymgysylltu ac ymddygiad.
• Ethos Cadarnhaol: Mae amgylchedd cynhwysol yr ysgol yn sicrhau bod staff, disgyblion, rhieni ac ymwelwyr yn teimlo bod croeso iddynt. Mae diwylliant diogelu cryf yn cyfrannu at ymdeimlad o ddiogelwch ymhlith y rhan fwyaf o ddisgyblion.
• Llwyddiant presenoldeb: Mae strategaethau clir ar gyfer monitro a chefnogi presenoldeb wedi arwain at gyfraddau gwell, yn enwedig ymhlith disgyblion sy'n gymwys i gael prydau ysgol am ddim.
• Cwricwlwm Amrywiol: Mae cwricwlwm yr ysgol yn pwysleisio dealltwriaeth o amrywiaeth a diwylliannau eraill. Mae ymdrechion i wella sgiliau darllen wedi dangos canlyniadau cadarnhaol, gyda disgyblion yn gyffredinol yn gwneud cynnydd da ar draws pynciau.

Dywedodd y Pennaeth, Chris Norman: "Mae'r tîm yn Willows yn falch o rannu adroddiad ein harolwg sy'n dathlu'r newidiadau cadarnhaol a ddaeth yn sgil y gymuned gyfan, gan ddod ynghyd i wella cyfleoedd bywyd ein disgyblion. Diolch i'r staff, disgyblion, rhieni, llywodraethwyr ac aelodau o'r gymuned sydd wedi gweithio mor galed i wneud y gwelliannau hyn yn bosibl."

Ychwanegodd James Ellis, Cadeirydd y Llywodraethwyr: "Mae'r adroddiad yn adlewyrchu'r amgylchedd dysgu cadarnhaol sydd gennym yn Willows, lle mae gwerthoedd yr ysgol yn rhai go iawn. Mae Ysgol Uwchradd Willows wedi bod ar daith o wella, a gyflawnwyd yn yr adroddiad hwn ac a welir yng ngwaith caled pawb, ein hathrawon, disgyblion a staff cymorth."

Mae'r adroddiad yn dathlu sawl agwedd ar yr ysgol ac i barhau â'i thaith o welliant, mae Estyn wedi gwneud tri argymhelliad ar gyfer gwella y bydd yr ysgol yn mynd i'r afael â nhw yn ei chynllun gweithredu:

• Sicrhau bod addysgu'n herio disgyblion yn gyson i wneud cynnydd cryf a datblygu eu sgiliau'n dda.
• Sicrhau bod prosesau hunanwerthuso yn fanwl gywir ac yn canolbwyntio ar effaith a bod pob arweinydd yn defnyddio'r prosesau hyn yn effeithiol i gynllunio ar gyfer gwelliant a sicrhau gwelliant.
• Cynyddu nifer y disgyblion sy'n cwblhau cymhwyster TGAU Cymraeg a gwella sgiliau siarad Cymraeg disgyblion

Mae gwaith yn mynd rhagddo i adeiladu Ysgol Uwchradd Willows newydd sbon. Bydd y datblygiad £60m yn golygu y bydd yr ysgol yn cael ei hailadeiladu a'i hadleoli i ddarparu ar gyfer 900 o ddysgwyr yn ogystal â Chanolfan Adnoddau Arbennig 30 lle ar gyfer disgyblion ag Anghenion Dysgu Cymhleth. Bydd yn darparu amgylcheddau addysg o ansawdd rhagorol i gefnogi a gwella addysgu a dysgu.Disgwylir i'r ysgol newydd gael ei chwblhau ym mlwyddyn academaidd 2026/27, a bydd gan yr ysgol newyddgyfleusterau chwaraeon cynhwysfawr gan gynnwys neuadd chwaraeon, campfa, stiwdio ddrama a chaeau glaswellt a fydd ar gael i'r cyhoedd eu defnyddio y tu allan i oriau ysgol.

Dywedodd yr Aelod Cabinet dros Addysg, y Cynghorydd Sarah Merry: "Dylai Ysgol Uwchradd Willows fod yn falch o'r adborth cadarnhaol gan Estyn sy'n cydnabod gwaith caled staff a brwdfrydedd disgyblion. Roedd yn arbennig o braf clywed am y gwelliant sylweddol mewn presenoldeb a gyflawnwyd drwy fonitro a chefnogi'r ysgolion, a bod hyn yn parhau i wella'n dda.

"Mae'r ysgol yn dechrau ar bennod newydd gyffrous ac unwaith y bydd wedi'i chwblhau, bydd yr ysgol newydd yn cynnig adnoddau addysgol, arbenigedd a chyfleoedd addysgu rhagorol i ddisgyblion a staff, sy'n addas ar gyfer dysgu'n yr 21ain ganrif.

"Mae hyn, ynghyd â sylwadau calonogol Estyn, yn paratoi'r ffordd ar gyfer dyfodol llwyddiannus a disglair i'r ysgol."

Adeg yr arolygiad, roedd gan Ysgol Uwchradd Willows 808 o ddisgyblion ar y gofrestr. Mae 54.8% o'r disgyblion yn gymwys i gael prydau ysgol am ddim, mae 8% o ddisgyblion yn nodi bod ganddynt anghenion dysgu ychwanegol ac mae 14.7% yn siarad Saesneg fel iaith ychwanegol.