Mae Vape Mini Market a Best One Vape wedi cael eu cau am dri mis gan y Gwasanaethau Rheoliadol a Rennir (GRhR) ar ôl i Lys Ynadon Caerdydd rhoi Gorchmynion Cau oherwydd Ymddygiad Gwrthgymdeithasol, ddydd Gwener, 22 Tachwedd a dydd Mawrth, 26 Tachwedd.

Mae'r Gorchmynion yn cau'r siopau ar unwaith ac yn eu hatal rhag masnachu am dri mis. Os cânt eu hagor ar gyfer busnes yn ystod y cyfnod hwn, gallai perchnogion y busnesau dderbyn tri mis yn y carchar, dirwy neu'r ddau.

Cafodd ymchwiliad ei lansio yn dilyn cwynion gan y cyhoedd bod y siopau yn gwerthu cynnyrch tybaco anghyfreithlon ac e-sigaréts anghyfreithlon.

Dangosodd nifer o bryniannau prawf fod tybaco ffug, e-sigaréts anghyfreithlon a sigaréts di-doll wedi eu smyglo i'r DU, yn cael eu gwerthu o'r safle. Roedd 50g o dybaco Amber Leaf ffug yn cael ei werthu am gyn lleied â £5 pan fyddai’r pris manwerthu arferol yn £40. 

Dywedodd llefarydd ar ran Cyngor Caerdydd: "Mae tybaco anghyfreithlon yn gwneud niwed mawr yn y gymuned. Mae’r ffaith ei fod yn rhad ac yn hawdd i’w gyflenwi yn arbennig o ddeniadol i bobl ifanc ac eraill ar incwm is, ac mae'n dileu'r cymhelliant pris i ysmygwyr presennol roi'r gorau i'r arfer. Mae gwerthu tybaco anghyfreithlon yn aml yn cael ei gysylltu â throseddau eraill hefyd, gyda grwpiau troseddol cyfundrefnol yn rheoli'r farchnad, ac elw o'r gwerthiant yn cael ei ddefnyddio i ariannu gweithgareddau troseddol eraill.Rwy'n falch iawn o weld y camau hyn yn cael eu gweithredu. Mae angen i droseddwyr wybod y byddant yn wynebu canlyniadau os byddant yn dewis delio yn y cynnyrch anghyfreithlon hyn.

Cafodd ymchwiliad y GRhR i'r ddwy siop yma gefnogaeth Heddlu De Cymru, Ash Cymru, Gwasanaeth Tân ac Achub De Cymru, Tollau Tramor a Chartref EF a Chynghorwyr Lleol.

Anogir unrhyw un sydd â gwybodaeth yn ymwneud â gwerthu tybaco anghyfreithlon i roi gwybod amdano, yn ddienw, yn https://noifs-nobutts.co.uk/report-illegal-tobacco-in-wales