17/7/2024

Yn galw ar bob crëwr cynnwys ifanc yng Nghaerdydd! Mae tîm digidol Gwasanaeth Ieuenctid Caerdydd yn falch iawn o gyhoeddi cyfle unigryw i bobl ifanc 11-17 oed gymryd rhan mewn gwersyll haf digidol am yr ail flwyddyn yn olynol.

Bydd y cynllun cyffrous yn rhedeg am saith diwrnod dros gyfnod o bythefnos yn ystod gwyliau'r haf ac yn cynnig profiad ymdrochol mewn adrodd straeon digidol a chynhyrchu fideo. Bydd cyfranogwyr yn gweithio mewn grwpiau bach i ddatblygu straeon difyr, recordio a golygu eu fideos eu hunain, ac arddangos eu gwaith mewn sioe première ar y diwrnod olaf.

Uchafbwyntiau'r Rhaglen:

• Gweithgareddau dan arweiniad cyfoedion
• Ysgrifennu sgript
• Gwaith Tîm
• Gwaith Camera
• Adrodd
• Golygu
• Effeithiau Arbennig (gan gynnwys technegau cynhyrchu sgrin werdd a rhithwir fel y rhai a ddefnyddir yn "The Mandalorian")
• Digwyddiad arddangos

Bydd gweithwyr ieuenctid o Wasanaeth Ieuenctid Caerdydd, ynghyd â Doug Green, darlledwr Americanaidd gyda dros 30 mlynedd o brofiad, yn arwain y rhaglen. Mae'r bartneriaeth rhwng Doug a Gwasanaeth Ieuenctid Caerdydd eisoes wedi arwain at gyfnewidfa ryngwladol, gyda chrewyr ifanc o Gaerdydd yn ymweld â Chaliffornia a Butetown Buzz yn ennill Gwobr Darlledu Eithriadol yng nghystadleuaeth fawreddog STN.

Bydd wyth o fyfyrwyr sy'n gwirfoddoli o Ysgol Uwchradd Carlsbad yn Carlsbad, Califfornia, yn ymuno â'r gwersyll fel cyfranogwyr a mentoriaid. Bydd y gwneuthurwyr ffilm a'r darlledwyr arbennig hyn yn rhannu eu harbenigedd ym mhob agwedd ar wneud ffilmiau, gan gynnwys ffilmio, golygu, effeithiau arbennig, a chynhyrchu fideo proffesiynol ar gyfer YouTube a'r cyfryngau cymdeithasol. Maent hefyd yn gyffrous i ddysgu am ddiwylliant Cymru a rhannu mewnwelediadau am ddiwylliant Americanaidd.

Cefnogir y gwersyll gan Goleg Caerdydd a'r Fro, gyda sesiynau'n cael eu cynnal ar eu campws yng nghanol y ddinas ar Heol Dumballs. Bydd Media Cymru yn cyflwyno gweithdai ar gynhyrchu rhithwir, bydd y cyflwynydd Mo Jannah yn cynnig ei sgiliau a'i brofiadau a bydd cyfranogwyr yn mwynhau taith o amgylch BBC Cymru ar ddiwrnod pedwar.

Dywedodd y Cynghorydd Peter Bradbury, yr Aelod Cabinet dros Drechu Tlodi, Cydraddoldeb a Chefnogi Pobl Ifanc: "Mae gwersyll haf Crewyr Cynnwys Caerdydd yn gyfle cyffrous sy'n rhoi cyfle i bobl ifanc ddysgu sgiliau newydd a chysylltu â meddyliau creadigol eraill yn eu cymuned.

Gyda ffocws ar gydweithio a chyfathrebu, bydd cyfranogwyr yn gallu ymarfer eu sgiliau adrodd straeon a chynhyrchu fideo, gan baratoi'r ffordd ar gyfer cyfleoedd creadigol yn y dyfodol.

"Mae'r gwersyll yn un o'r cyfleoedd niferus sy'n cael eu rhoi drwy raglen ddigwyddiadau'r haf eleni, gan roi mynediad i ystod eang o ddarpariaeth i bobl ifanc gymryd rhan mewn gweithgareddau anffurfiol yn seiliedig ar eu hanghenion."

Am fwy o wybodaeth, cysylltwch âCrewyr Cynnwys Caerdydd | Tocynnau, Llun 29 Gor 2024 am 10:00 | Eventbrite