25.04.22
Mae Nakeisha Sheppard yn sicr yn rhywun sy'n mwynhau ei gwaith ond yna, fel Hyfforddai Swyddog Chwarae cyntaf Cyngor Caerdydd, nid yw hynny'n syndod.

Wedi ei chyflogi fis Tachwedd y llynedd, mae'n treulio llawer o'i diwrnod yn helpu plant ledled y ddinas i fwynhau ystod eang o weithgareddau chwarae, chwaraeon a diddordebau, ond mae hi hefyd yn ennill sgiliau gwerthfawr ei hun drwy gyrsiau hyfforddi a phrofiad ymarferol.

Dros y ddwy flynedd nesaf, y bwriad yw i Nakeisha gymhwyso fel Swyddog Chwarae a mynd ymlaen i ymgymryd â mwy o gyfrifoldeb o fewn tîm chwarae'r cyngor.

"Dyma'r swydd ddelfrydol i mi," meddai.  "Rwyf bob amser wedi bod eisiau gweithio gyda phlant ac fe wnes i wneud fy ngradd mewn seicoleg ym Mhrifysgol Met Caerdydd gyda'r math yma o waith mewn golwg.

"Pan wnes i raddio yn 2019 es i i weithio mewn canolfan chwarae breifat ger fy nghartref yn Nhreganna ond yna fe darodd Covid ac, er fy mod ar ffyrlo, newidiodd popeth.

"Roeddwn i eisiau dychwelyd i'r gwaith a ches rôl drwy asiantaeth fel Cynorthwyydd Addysgu yn Ysgol Parc Ninian yn Grangetown ond dim ond am y gwaith roeddech yn ei wneud yn ystod y tymor y caech eich talu. Felly pan glywais am y swydd hon es i amdani ac roeddwn wrth fy modd pan gefais hi."

Ers iddi ddechrau gyda'r cyngor, mae Nakeisha wedi cael llawer o hyfforddiant wedi'i gynllunio i fynd â hi i gymhwyster Lefel III mewn Gwaith Chwarae.  "Rwyf eisoes wedi gwneud rhan gyntaf fy Lefel II ac wedi cael hyfforddiant mewn cymorth cyntaf, diogelu a gweithgareddau chwarae 'rhannau rhydd' – gan alluogi plant i chwarae gan ddefnyddio gwrthrychau bob dydd, yn hytrach na theganau.

"Byddaf hefyd yn cael profiad o weithio yn y swyddfa ac ochr weinyddol pethau pan fydd pawb yn dychwelyd i weithio yn y swyddfa, yn hytrach na gweithio gartref."

Mae'r hyfforddeiaeth, er yr un cyntaf yn adran Chwarae'r cyngor, yn dilyn llwyddiant y cynllun mewn meysydd eraill ac mae'n ymrwymiad gan y cyngor i ddatblygu pobl ifanc i baratoi ar gyfer y gweithle.

Dwedodd Steve Morris, rheolwr gweithredol, fod y rhan fwyaf o'r hyfforddeion yn ystod y blynyddoedd diwethaf wedi symud ymlaen i swyddi llawn amser, o ganlyniad i'r hyfforddiant a'r profiad gwaith a thrwy ddatblygu'r sgiliau sydd eu hangen ar gyfer y swydd.

"Mae'r cynllun wedi gweithio'n dda i ni mewn rhannau eraill o'r gwasanaeth," meddai, "ac rwy'n falch iawn o allu datblygu hyfforddai arall, y tro hwn mewn chwarae plant.  Edrychaf ymlaen at weld sut mae Nakeisha yn datblygu yn y rôl hon a'r effaith gadarnhaol y bydd yn ei chael ar fywydau'r plant sy'n mynychu'r sesiynau chwarae."

I Sarah Stork, rheolwr Nakeisha, mae'r hyfforddeiaeth newydd yn ffordd ddelfrydol o ddod o hyd i'r genhedlaeth nesaf o swyddogion Chwarae.  "Mae'n fenter newydd i ni," meddai, "ac os bydd y cyfle'n codi eto byddwn yn sicr yn edrych i’w ailadrodd.

"Yn y gorffennol rydym wedi tueddu i gyflogi Swyddogion Chwarae sydd eisoes wedi cymhwyso.  Gall cael cymwysterau fod yn broses ddrud ond mae'r hyfforddeiaeth hon wedi'i chynllunio i helpu gyda hynny a gwneud y sefyllfa'n fwy deniadol.  Rydym am gefnogi pobl ifanc i gael gwaith ac mae gallu cynnig hyfforddiant yn bwysig."

Mae Tîm Chwarae'r cyngor wedi'i leoli yn Sblot ond mae'n gwneud llawer o waith allgymorth mewn ysgolion ledled Caerdydd, yn cynnal sesiynau chwarae ar ôl ysgol ac yn gweithio gyda grwpiau penodol fel gofalwyr ifanc a'r gymuned teithwyr.

"Mae'r gwaith yn amrywiol iawn a dyna sy'n apelio ataf," meddai Nakeisha.  "Ddoe roeddwn i mewn ysgol ac yna'n gwneud sesiwn chwarae pan oedd yr ysgol wedi gorffen.  Rydym yn trefnu pêl-droed, paentio a chrefftau i blant rhwng pump a 14 oed yma yn Sblot a hefyd yng Nghanolfan Ieuenctid Trelái, Canolfan Gymunedol Cathays, Ysgol Gynradd Mount Stuart a phafiliwn Butetown hefyd.

"Mae fy nghydweithwyr yn hynod o gymwynasgar a chyfeillgar ac mae wedi bod yn braf cwrdd â llawer o blant.  Mae hefyd wedi bod yn wych gweithio i'r cyngor – rydych yn clywed pethau da am sut y gallwch symud ymlaen a'r manteision ac rwy'n hapus iawn.

"Roedd fy nheulu bob amser yn dweud pa mor dda oeddwn i gyda phlant a nawr rwy'n gwneud defnydd da o hynny."

• Mae Caerdydd ar Waith, asiantaeth recriwtio fewnol y Cyngor, wedi symleiddio’i brosesau ymgeisio i'w gwneud yn gyflymach ac yn haws i ymgeiswyr wneud cais am swyddi dros dro.  Gall ymgeiswyr sydd â diddordeb mewn cofrestru i wneud cais am unrhyw un o'r ystod eang o swyddi dros dro o fewn yr awdurdod, sydd ar gael drwy Caerdydd ar Waith, gwblhau ffurflen gais ac asesiad ar-lein – gan gyflymu'r broses a oedd gynt yn gofyn i ymgeiswyr fynychu asesiad wyneb yn wyneb. Mae swyddi ar gael mewn nifer enfawr o feysydd sy'n adlewyrchu'r ystod eang o wasanaethau y mae'r cyngor yn eu darparu ledled y ddinas.  Caiff swyddi gwag dros dro gyda'r Cyngor eu diweddaru'n rheolaidd ar www.caerdyddarwaith.co.uk/  Mae'r wefan hefyd yn cynnig  ystod eang o gyngor a chymorth cyflogadwyedd i helpu pobl sy’n chwilio am swyddi neu am newid gyrfa i ennill y sgiliau, y profiad a'r wybodaeth a fydd yn eu helpu i bontio i gyflogaeth gynaliadwy mewn sector sy'n addas iddynt.
• Mae Cyngor Caerdydd yn gweithio i fod yn Ddinas sy'n Dda i Blant a gydnabyddir yn rhyngwladol, fel yr argymhellwyd gan Bwyllgor y DU ar gyfer UNICEF.  I gael gwybod mwy am bolisïau'r cyngor yn y maes hwn, ewch i https://www.childfriendlycardiff.co.uk/cy/