Bydd y digwyddiad ‘Pethau’r Nadolig’ yn digwydd o 6pm-9pm ddydd Iau 14 Tachwedd. Nid yw manylion llawn y noson wedi’u cadarnhau eto ond gall ymwelwyr ddisgwyl gweld llawer o’u hoff stondinau, eitemau a gwasanaethau ychwanegol, a thamaid o hud a lledrith hefyd – gan gynnwys disgo’r 80au.
Dywedodd yr Aelod Cabinet dros Fuddsoddi a Datblygu, y Cynghorydd Russell Goodway:“Yn ogystal â bod yn gartref i fusnesau lleol bach, mae gan y Farchnad botensial i fod yn gyrchfan unigryw i ymwelwyr, yn cyfuno popeth sy’n dda am y brifddinas gyfoes y mae Caerdydd wedi tyfu i fod a threftadaeth Fictoraidd hynod y farchnad.
“Mae masnachwyr wedi bod yn awyddus i adeiladu ar lwyddiant y farchnad nos gyntaf a gynhaliwyd yn gynharach yn yr haf, ac ry’n ni’n falch o gefnogi hyn.Mae pobl yn dweud y gallwch ddysgu llawer am ddinas o'i marchnad – mae’r digwyddiadau hyn yn dangos yn amlwg fod Caerdydd ar agor ar gyfer busnes, yn fywiog ac yn edrych tua'r dyfodol.”
Ar gyfer y Farchnad Nos gyntaf, a gynhaliwyd ym mis Gorffennaf, trawsnewidiwyd caffi’r Celtic Corner yn ‘Gornel y Cerddor’ gyda cherddoriaeth gan y chwedlonol Kelly’s Records, a chrëwyd arddangosfa gelf gyda phortreadau o rai o’r cymeriadau sy’n masnachu o dan do gwydr trawiadol y farchnad.
Bu’r
digwyddiad yn llwyddiant yn ôl y masnachwyr, gyda Paul Reeves o Mojo King yn
disgrifio’r noson fel “llawer o sbort – fel parti mawr” a Jeremy Phillips o
Ffwrnes Pizza yn canmol y ffordd y gwnaeth y noson “arddangos ein marchnad a’i
masnachwyr i gwsmeriaid newydd a phresennol.”